Energy Drinks Affect: ప్రస్తుతం జీవన విధానంలో చాలా మంది శరీరానికి తక్షణ శక్తి కోసం ఎనర్జీ డ్రింక్స్‌ను ఎక్కువగా తాగుతున్నారు. ఇవి కొన్నేళ్లపాటు శరీరానికి ఉత్తేజాన్ని ఇచ్చినప్పటికీ.. దీర్ఘకాలంలో ఈ డ్రింక్స్ వల్ల అనేక అనారోగ్య సమస్యలకు దారితీసే అకాశం ఉంది. ముఖ్యంగా ఈ కూల్ డ్రింక్స్ వల్ల కిడ్నీలపై ఎలాంటి ప్రభావం చూపిస్తాయో ఇప్పుడు తెలుసుకుందాం.
కిడ్నీలు మన శరీరంలోని వ్యర్థాలను బయటకు పంపడం అలాగే రక్తాన్ని శుద్ధి చేయడం, నీటి సమతుల్యతను కాపాడటం, రక్తపోటును నియంత్రించడం వంటి ముఖ్యమైన పనులు చేస్తాయి. అయితే పోషకాహారం తినకపోవడం, సరైన జీవన విధానం పాటించకపోతే మూత్రపిండాల పనితీరు మందగించి అనారోగ్య సమస్యలు తలెత్తుతాయని నిపుణులు చెబుతున్నారు.
ఈ డ్రింక్స్ లో ఎక్కువగా కెఫిన్, చక్కెర, రంగులు, రుచులను కలిగి, కొన్ని మూలికా పదార్థాలు ఉంటాయి. ఇవి శరీరానికి తాత్కాలిక శక్తిని అందించినా..ఎక్కువగా తీసుకుంటే కొన్ని సమస్యలు కలిగించవచ్చు.
డీహైడ్రేషన్
ఎనర్జీ డ్రింక్స్‌లో కెఫిన్ అధికంగా ఉంటుంది. ఇది శరీరంలో నీటిని త్వరగా తగ్గించడమే కాకుండా.. ఎక్కువగా మూత్రం పోవడానికి దారితీస్తుందని నిపుణులు చెబుతున్నారు. తగినంత నీరు తాగకుండా అధికంగా ఎనర్జీ డ్రింక్స్ తాగడం వల్ల నీటి లోపం వస్తుందని చెబుతున్నారు. దీని వల్ల కిడ్నీలపై ఒత్తిడి పెరిగి వాటి పనితీరు బలహీనపడుతుంది.
రక్తపోటు పెరగడం
ఈ ఎనర్జీ డ్రింక్స్‌లో ఉండే కెఫిన్ రక్తనాళాలను ప్రభావితం చేసి రక్తపోటును పెంచే అవకాశం ఉంది. అధిక రక్తపోటు వల్ల మూత్రపిండాల పనితీరు దెబ్బతిని.. దీర్ఘకాలంలో మూత్రపిండాల వ్యాధులు వచ్చే అవకాశం ఉంటుంది.
చక్కెర ప్రభావం
చాలా ఎనర్జీ డ్రింక్స్‌లో తాగడం వల్ల రక్తంలో చక్కెర స్థాయిలు పెరిగి మధుమేహం వచ్చే అవకాశం ఉంటుంది. మధుమేహం వల్ల మూత్రపిండాలు దెబ్బతినే అవకాశం ఎక్కువగా ఉంది.
కిడ్నీలో రాళ్లు
కొన్ని ఎనర్జీ డ్రింక్స్‌లో ఫాస్ఫారిక్ యాసిడ్ అనే పదార్థం ఉంటుంది. ఇది మూత్రపిండాల్లో కాల్షియం స్థాయిలను పెంచి రాళ్లు ఏర్పడే అవకాశాన్ని పెంచుతుంది.
ఎవరు జాగ్రత్తగా ఉండాలి..?
మూత్రపిండాల సమస్యలు ఉన్నవారు జాగ్రత్తగా ఉండాలి
రక్తపోటు, మధుమేహం ఉన్నవారు
గర్భిణీలు, పాలిచ్చే తల్లులు
పిల్లలు, వృద్ధులు
ఆరోగ్యకరమైన డ్రింక్స్
ఎనర్జీ డ్రింక్స్‌కు బదులుగా సహజమైన డ్రింక్స్ లను ఎంచుకోవడం మంచిది. కొబ్బరి నీరు, తాజా పండ్ల రసాలు, గ్రీన్ టీ, మజ్జిగ వంటి వాటిని తీసుకోవడం ద్వారా శరీరానికి మేలు చేస్తాయి. తగినంత నీరు తాగడం, మంచి ఆహారపు అలవాట్లు పాటించడం, శరీరాన్ని చురుకుగా ఉంచడం ద్వారా ఎనర్జీ డ్రింక్స్ అవసరం లేకుండా ఆరోగ్యంగా ఉండవచ్చు.
